العودة للمدونة

الكندي والعلاج بالموسيقى: قصة العود والصبي

عزفت وسجّلت على آلات موسيقية كتير، بس من أكتر الآلات اللي إلها وقع مختلف عالنفس والروح بالنسبة إلي هي آلة العود.

وهالشي مانه صدفة. بيقولوا إنه كل وتر بالعود مصمّم ليمثّل جزء معيّن من الطبيعة، يعني العود مو بس آلة بتطلّع صوت حلو، هو صورة صغيرة عن الطبيعة اللي نحنا جزء منها.

قصة الكندي والصبي

من أشهر الناس اللي استخدموا العود لعلاج الأمراض، مو بس النفسية وحتى الجسدية، هو الكندي، الفيلسوف والعالِم اللي عاش ببغداد.

ومن أشهر الحالات اللي بتنحكى عنه، صبي أصابه شلل مفاجئ وفقد القدرة على الحكي. أبوه كان تاجر كبير ومعروف بالمنطقة، بس كان يعادي الكندي ويفتري عليه. ما ترك طبيب معروف ببغداد إلا وجابه ليعالج ابنه، وعالفاضي، ما حدا قدر يعمله شي.

وبالآخر، لما سمع إنه الكندي عنده تجربة مع هيك نوع من الأمراض، راح لعنده بكل تواضع وطلب منه المساعدة. والكندي حمل حاله وراح لبيت التاجر، وجاب معه فرقة من العوّادين، من أمهر تلامذته.

قعدوا كلهن جنب الصبي، وطلب منهن الكندي يعزفوا بمقامات وإيقاعات معيّنة. وهو ضل يراقب نبض الصبي، لحد ما بلّش النبض يتفاعل مع الاهتزازات الصوتية والإيقاعية اللي حواليه.

وهالشي خلّى أخلاط جسمه ترجع تتوازن، والشلل صار يزول شوي شوي، لحد ما قدر الولد يقعد وصار يحكي مع أبوه بكل وضوح واتزان.

الأخلاط بالطب القديم هي سوائل الجسم الأربعة: الدم والبلغم والصفراء والسوداء، وتوازنها كان يعني الصحة.

الموسيقى أكتر من تسلية

ناس كتير يمكن تستغرب، أو حتى ما تصدّق قوة الموسيقى والصوت بحياتنا. وبرأيي هاد من أكتر الجوانب اللي ما انعطت حقها، وما استعملناها متل ما لازم بحياتنا.

الموسيقى ممكن تكون أداة فعّالة، أكتر من مجرد وسيلة تسلية عادية منسمعها بالخلفية ونحنا مشغولين بشي تاني. وهاد الشي اللي عم حاول اشرح عنه وأحكي عنه أكتر عبر هالقناة ومشروع عكاظ.

عشر مقطوعات عود للتأمل

حبيت اليوم شارك هالجانب التأملي والروحي عبر آلة العود. لهيك سجّلت ١٠ مقاطع عزف عود منفرد، استخدمت فيها ١٠ مقامات مختلفة، أساسية وفرعية، لأعطي ألوان متنوعة. بس كلها بخدمة التأمل والروح والنفس.

بتلاقيها هلّق بتطبيق عكاظ: استماع ‹ معزوفات ‹ عود تأملي.

جرّب تسمعها وتختبرها بنفسك بأي وقت حابب تروق فيه، وإنت عم تشرب قهوتك أو عم تتمشّى مثلاً. ما في شي لازم تعمله، بس اسمع.

وإذا حابب تقوّي التجربة: ترايلوما

إذا حابب تقوّي من هالتجربة، بنصحك تجرّب تقنية ترايلوما الخاصة. هي ميزة صوتية مبنية على علم الترددات، فيك تفعّلها تحت أي مقطوعة عم تسمعها بالتطبيق.

بتضيف ترددات مختلفة عبر السماعات، لهيك لازم تسمعها بسماعات. ومهمّتها تساعد الدماغ يفوت بالمنطقة اللي بين موجات ألفا وثيتا، ليوصل ذهنك لحالة راحة، بعيد عن المجهود الذهني والفكري اللي عم يتعبنا بيومنا ونحنا مو حاسّين.

ترايلوما جزء من باقة عكاظ بريميوم: اشتراك رمزي لتمارين تأمل وتنفّس خاصة، بالإضافة لمحتوى حصري بينزل باستمرار ضمن التطبيق. رح شارك فيه طرق معيّنة بتخص التأمل والتوازن النفسي، ما بتوقّع تلاقيها بأي مكان تاني.